កេរ្តិ៍ដំណែល
បើសិនជាអ្នកអានទាំងអស់គ្នាធ្លាប់ចាក់ចំរៀងដោយប្រើកុំព្យូទ័រ កាលពីកំឡុងចុងទស្សវត្ស ៩០ ហើយនិងកាលពីកំឡុងឆ្នាំ ២០០០ ជាង អ្នកទាំងអស់គ្នាប្រហែលជាបានប្រើកម្មវិធី Winamp ហើយ។ កាលនោះ វាល្បីណាស់។ វាក្លាយជាកម្មវិធីស្តង់ដារ សំរាប់ចាក់ចំរៀងក្នុងកុំព្យូទ័រទៅហើយ ដោយសារ វាចាប់ផ្ដើមដើររហ័ស ហើយស្គាល់ប្រភេទចំរៀងច្រើន។ ជាងនេះទៅទៀត Winamp ធ្វើអោយគ្រប់ៗគ្នា មានកម្មវិធីចាក់ចំរៀងដែលមានរូបរាងដោយឡែក ផ្សេងៗគ្នា ទៅតាមចំណូលចិត្ត របស់អ្នកស្ដាប់។ វាត្រូវបានគេដោនឡូដយកប្រហែល៣លានដង កំឡុងពេលដែលកម្មវិធីនេះចាប់ផ្ដើមបានទើបតែប្រហែល ១ ឆ្នាំជាង ហើយមិនទាន់ទាំងបានចូល កំណែ (Version) ទី២ ផង។ ឥលូវនេះ កំណែដែលថ្មីជាងគេបំផុតរបស់ Winamp គឺទី 5.6.6 ហើយប្រហែលជាកំណែចុងក្រោយបំផុត មុនពេលកម្មវិធីចាស់ក្រែលនេះ ត្រូវបានគេរុញចូលក្នុងកេះទុកចោល នៅចុងឆ្នាំនេះ។
អារម្មណ៍កាលពីក្មេង
ត្រឹមត្រូវ ហើយដែលពេលដែលខ្ញុំប្រើប្រាស់ Winamp វាតែងតែមានអារម្មណ៍ថា កំពុងតែរំលឹកអតីតកាល ពេលដែលនៅលេងហ្គេមកុំព្យូទ័រ តាម Network ជាមួយ នឹងពួកម៉ាកក្មេងៗ ហើយចាក់ចំរៀងចោលជា Background កំដរពេលលេងហ្គេម។ ម្នាក់មាន Winamp មួយ ហើយពេលបើក Speaker ក្នុងពេលជាមួយគ្នា ធ្វើអោយលឺសូរសំលេងចំរៀងជាច្រើនមិនដឹងជាបទណា របស់កុំព្យូទ័រណា។ អស្ចារ្យណាស់។ ហើយបើចង់បានអារម្មណ៍នេះខ្លាំងជាងនេះទៀត គឺប្ដូរ Skin របស់ Winamp Modern អោយទៅជា Classic ដូចដែលកាលរាងដើមរបស់វា កាលពីជំនាន់នោះថែមទៀត។
 |
| Winamp Modern ប្រើ Classic skin |
សមត្ថភាព
អូ! បើនិយាយពីសមត្ថភាពវិញ គឺខ្លាំងតែម្ដង។ មិនមែនសុខៗ មានមនុស្សជាច្រើនដោនឡូដ និង ប្រើប្រាស់ Winamp រាប់លាននាក់ទេ។ វាជាកម្មវិធីដំបូង (ដែលខ្ញុំឃើញ) មានទំហំតូច ចាប់ផ្ដើមលឿន ស្គាល់ចំរៀងបានច្រើនប្រភេទ ហើយមានអេគុយ (Equalizer) មួយឡូយរបស់គេ។ វាមាន Playlist សំរាប់ដាក់តំរង់ជួរ បទចំរៀងដែលចង់ចាក់បន្តបន្ទាប់គ្នា ហើយសូម្បីតែ Save playlist នោះទុកពេលក្រោយស្ដាប់ ពេលចំអារម្មណ៍ផងដែរ។
 |
| Skin S7Reflex ដែលជាSkin ដែលអាចដោនឡូដបាន |
កំណែក្រោយមកទៀត ឃើញវាចាប់ផ្ដើមមាន Skin ដែលអ្នកស្ដាប់អាចកែ តាមអារម្មណ៍ ចំណង់ចំណូលចិត្ត ហើយបើខ្ជិលទេ ដោនឡូដ យកពី winamp.com តែម្ដងក៏បាន។ មានទាំង Plug-ins សំរាប់កែអ្វីៗក្នុង Winamp តាំងពីឡូយៗ រហូតដល់ ឡប់ៗ។ មានទាំង Plug-in សំលេងដែលចេញទៅ អោយលឺ Surround ឬ ក៏លឺដូចខ្មោច។ Plug-ins សំរាប់ Crossfade ចំរៀង (កាលជំនាន់ មិនទាន់មាន Crossfade) ហើយរាប់ដល់ទាំង Plug-ins សំរាប់លេងហ្គេម Nintendo ឬ ក៏ជា Messenger ផង។ មាន Plug-ins រាប់រយ គ្រាន់តែសំរាប់ Visualization តែមួយ។
កំណែថ្មីៗ មានទាំង សេវាកម្ម Online ដូចជា វិទ្យុ Online (Shoutcast), CD Rip ទៅជាចំរៀងច្រើនប្រភេទ ហើយល្បឿនលឿនផង។
ភាពដោយឡែក
អ្វីដែលជំរុញចិត្តខ្ញុំអោយនៅតែប្រើ Winamp គឺមិនមែនគ្រាន់តែដោយសារអារម្មណ៍ពីអតីតកាលប៉ុណ្ណោះទេ តែខ្ញុំចូលចិត្តសេរីភាពក្នុងការកែប្រែ បន្ថែម បន្ថយ នៅក្នុង Winamp។ ខ្ញុំធ្លាប់ធ្វើ Skin កាលជំនាន់ Winamp ដំបូងៗ ដោយសារតែវាងាយស្រួលកែខ្លាំងណាស់ ហើយសូម្បីតែព៌ណរបស់ Winamp ក៏ខ្ញុំអាចដូរបានយ៉ាងរហ័ស ដោយមិនចាំបាច់ធ្វើ Skin ផ្ទាល់ខ្លួនឡើយ។ ខ្ញុំចូលចិត្តដែល Winamp ជាកម្មវិធីមួយ ដែលមានសមត្ថភាពគ្រប់យ៉ាងដែលអ្នកស្ដាប់ចំរៀងត្រូវការ។ វាមាន Equalizer ដែលគ្រប់គ្រាន់ ហើយបើត្រូវការមាន បង់ (Bands) បន្ថែម គឺគ្រាន់តែទៅដោនឡូដ Plug-ins ពី Winamp.com ក៏រួចជាស្រេចទៅហើយ។ វាមាន Global Hotkeys ដែលខ្ញុំអាចប្ដូរបទចំរៀង ដោយមិនចាំបាច់ Minimize កម្មវិធីដែលខ្ញុំកំពុងប្រើឡើយ (ជាពិសេសពេលកំពុងលេងហ្គេមជាដើម)។ វាមាន Gracenote ដែលស្គាល់ចំណងជើងបទចំរៀងបរទេសខ្លួនវា។ ខ្ញុំធ្លាប់អង្គុយកែ AVS Visualization ហើយឃើញថាវាឡូយ។ វាស្វែងរកបទចំរៀងថ្មី យ៉ាងរហ័ស។ និយាយអោយខ្លីទៅ គឺវាមានអ្វីគ្រប់យ៉ាងដែលខ្ញុំត្រូវការ ពីកម្មវិធីចាក់ចំរៀងមួយ។
 |
| Screenshot របស់ Winamp នៅក្នុងកុំព្យូទ័រខ្ញុំ |
Winamp ត្រូវគេបិទ
Winamp ត្រូវបានគេលក់អោយ AOL កាលពីឆ្នាំ ១៩៩៩។ បុគ្គលិក Winamp លែងមានគំនិតប្លែកៗដូចមុន ដោយសាររបៀបដឹកនាំថ្មី ក្រោមក្រុមហ៊ុនមេមួយថ្មី (យោងតាម Winamp Blog)។ ដោយសារ តែ Winamp រត់មិនទាន់របត់ថ្មីរបស់កម្មវិធីចាក់ចំរៀង ទើបធ្វើអោយ កម្មវិធីផ្សេងៗដូចជា iTunes ឬ Windows Media Player លប់ពីលើ។ គំនិតដែលកម្មវិធីចំរៀងមួយអាច ចាក់ចំរៀង ទិញចំរៀង SyncចំរៀងចូលiPod ក្លាយជារបត់ថ្មី។ ជាងនេះទៅទៀត កម្មវិធីវិទ្យុ Online ជាច្រើន (Play Music, Spotify) ធ្វើអោយអ្នកស្ដាប់លែងត្រូវការដោនឡូដចំរៀងទុកក្នុង Hard Disk ទៀត ហើយក៏ធ្វើអោយ Winamp ខ្សោយទៅៗ។
យ៉ាងណាក៏ដោយ Winamp នៅតែជា «ព្រឹទ្ធាចារ្យ» នៅក្នុងប្រភេទកម្មវិធីចាក់ចំរៀង ហើយសូម្បីតែផ្នែកខ្លះរបស់សមត្ថភាព Winamp ត្រូវបានគេទិញយកទៅដាក់ក្នុងកម្មវិធីផ្សេងៗ ដូចជា Milkdrop ទៅក្នុង iTunes ជាដើម។ គួរអោយសោកស្ដាយ ដែល Winamp នឹងត្រូវគេបិទមិនអោយដោនឡូដតទៅទៀត ហើយ Winamp.com ក៏លែងមាន ចាប់ពីថ្ងៃទី ២០ ខែធ្នូ ឆ្នាំ ២០១៣ នេះតទៅ។ តែ Winamp នៅតែខ្លាំង ហើយសង្ឃឹមថា នឹងមានមនុស្សចែកចាយ Winamp នៅលើអ៊ីនធើណេត តទៅទៀត។
 |
| Screenshot នៅលើ Winamp.com |
UPDATE: មានពត៌មានប្រាប់ថា Microsoft កំពុងពិភាក្សាទិញ Winamp ពី AOL។ បើសិនត្រូវថ្លៃគ្នា យើងអាចនឹងឃើញ Winamp រស់ឡើងវិញ ឬ សមត្ថភាពដើមរបស់ Winamp នៅ ក្នុងឧបករណ៍ ឬ កម្មវិធីថ្មីៗរបស់ Microsoft។
Winamp កម្មវិធីកុំព្យូទ័រដ៏យូរអង្វែងសំរាប់លេងបទចំរៀង កំពុងត្រូវបញ្ចប់កេរ្តិ៍ដំណែល (វិចារណកថា) by Vann is licensed under a Creative Commons Attribution-NonCommercial-ShareAlike 3.0 Unported License.
Based on a work at http://saidbyvann.blogspot.com/2013/11/winamp.html.
If you're attempting to burn fat then you need to try this totally brand new personalized keto meal plan diet.
ReplyDeleteTo create this service, certified nutritionists, fitness trainers, and professional chefs joined together to provide keto meal plans that are powerful, decent, price-efficient, and delicious.
Since their first launch in January 2019, 1000's of individuals have already completely transformed their body and health with the benefits a good keto meal plan diet can provide.
Speaking of benefits: in this link, you'll discover 8 scientifically-proven ones given by the keto meal plan diet.