កេរ្តិ៍ដំណែល
បើសិនជាអ្នកអានទាំងអស់គ្នាធ្លាប់ចាក់ចំរៀងដោយប្រើកុំព្យូទ័រ កាលពីកំឡុងចុងទស្សវត្ស ៩០ ហើយនិងកាលពីកំឡុងឆ្នាំ ២០០០ ជាង អ្នកទាំងអស់គ្នាប្រហែលជាបានប្រើកម្មវិធី Winamp ហើយ។ កាលនោះ វាល្បីណាស់។ វាក្លាយជាកម្មវិធីស្តង់ដារ សំរាប់ចាក់ចំរៀងក្នុងកុំព្យូទ័រទៅហើយ ដោយសារ វាចាប់ផ្ដើមដើររហ័ស ហើយស្គាល់ប្រភេទចំរៀងច្រើន។ ជាងនេះទៅទៀត Winamp ធ្វើអោយគ្រប់ៗគ្នា មានកម្មវិធីចាក់ចំរៀងដែលមានរូបរាងដោយឡែក ផ្សេងៗគ្នា ទៅតាមចំណូលចិត្ត របស់អ្នកស្ដាប់។ វាត្រូវបានគេដោនឡូដយកប្រហែល៣លានដង កំឡុងពេលដែលកម្មវិធីនេះចាប់ផ្ដើមបានទើបតែប្រហែល ១ ឆ្នាំជាង ហើយមិនទាន់ទាំងបានចូល កំណែ (Version) ទី២ ផង។ ឥលូវនេះ កំណែដែលថ្មីជាងគេបំផុតរបស់ Winamp គឺទី 5.6.6 ហើយប្រហែលជាកំណែចុងក្រោយបំផុត មុនពេលកម្មវិធីចាស់ក្រែលនេះ ត្រូវបានគេរុញចូលក្នុងកេះទុកចោល នៅចុងឆ្នាំនេះ។
